التكامل اللوني للمصورين

[fatma]

أول شي بعرفكم على صديقة عزيزة علينا كلنا .. أعرفكم على "دائرة الألوان"..



كلنا نعرف الألوان الأساسية (الأحمر، الأصفر، الأزرق) ، إذا أخذنا كل لون من هالألوان و حطيناه بزاوية مثلث ، و بعدين بين كل لونين حطينا اللون اللي ينتج من مزجهم راح يطلع لنا شكل مشابه للشكل المرسوم فوق.. و اللي يطلق عليه اسم دائرة الألوان.

إنزين شنو فايدة درس الإبتدائية هذا؟

الفايده أكبر من ما تتصور! فدائرة الألوان هذه هي حجر الأساس لعلم يطلق عليه اسم "نظرية اللون"
(Color Theory)
من هذا العلم سنتحدث اليوم عن علاقة لونية مهمة لكل فنان تشكيلي و مصور.. الا وهي علاقة "التكامل اللوني".

كل لون في دائرة الألوان له لون مكمل له
(Complementary Color)
فكيف نعرف هذا اللون المكمل؟

أبسط الطرق هي بالنظر إلى دائرة الألوان نفسها..

ما هو اللون المكمل للون الأحمر؟

اللون الأخضر

ما هو اللون المكمل للون البرتقالي؟

اللون الأزرق

شالسالفه؟ ليش قلنا الأحمر مع الأخضر؟ و ليش الأزرق مع البرتقالي؟

الجواب ببساطه هو إن اللونان المتكاملان هما كل لونين متقابلين في دائرة الألوان.

يعني اللون المكمل للأصفر هو......

برافو عليك..

البنفسجي

طيب..

عرفنا الحين شنو اهيه الألوان المتكامله... شنو فايدتهم لنا كمصورين؟


علاقة التكامل اللوني هي علاقة سحرية و تسوي العجايب اذا استخدمت صح ، فكل لونين متكاملين هما بنفس الوقت متضادين ، شنو يعني متضادين؟ ينعني يكسر كل واحد منهم حدة الثاني ، يعني اذا استخدما بنسب سليمة ممكن نصلح ألوان الصورة بإضافة عنصر صغير له لون مكمل للون السائد .. و بالتالي نحقق توازن لوني جميل يخدم الصورة بشكل سحري.. مثال:



اللون السائد بهالصوره هو اللون الأزرق المخضر شوي ، بالأحوال العادية كان ممكن نعتبر هالصوره فاشله نوعا ما .. لأن الوايت بالانس مالها غلط و مؤذي للعين ، لكن عنصر واحد صغير هو اللي وازن الصوره... السطل ، اللون البرتقالي المحمر للسطل عادل و وازن اللون السائد للصورة و بالتالي أعطاها حياة و حيوية كانت فاقدتها... مو قلتلكم سحر

اللون المكمل كذلك يمكن يستغل بصوره ثانيه ، من خواص اللون المكمل هو انه يبرز اللون اللي يكمله .. يعني يسوي حالة تباين
(Contrast)
مثلا اذا كنت بتصور مودل لابس فانيله صفره .. و انت قاصد انك تبرز هاللون بالذات لا تصوره على خلفيه برتقاليه أو حمره.. خل خلفيتك فيها نسبه من اللون البنفسجي أو أحدى درجاته ، مثال على التباين اللوني:



ترى هل كان احمرار الفراوله سيبرز بهذا الشكل لو كانت الخلفية بلون غير الأخضر؟

مفهوم التكامل اللوني من أهم المفاهيم اللي تفيد المصور الهاوي و المحترف ، ما أقول ان كل صورنا لازم يكون فيها تكامل لوني ولا ما راح تطلع حلوه! لكن اذا فهمنا فكرة التكامل لا إراديا راح نبدي نحس بالألوان من حوالينا بشكل أفضل .. و يصير اختيارنا لها مدروس و بعيد عن العشوائية ، شوف الطبيعه من حولك و تأمل اللوحات اللي رسمها لنا الخالق سبحانه و لاحظ العلاقات اللونية ما بينها و راح تحس بالمعنى الحقيقي للفن و الإبداع.

مزيدا من الأمثلة على التكامل اللوني:











البني و البيجي و العاجي (الحليبي) و الرمادي بدرجاته بالإضافة إلى الأبيض و الأسود كلها (بدرجات معينة) تسمى ألوانا محايدة (Neutral Colors)



و أركز هنا على مسألة "الدرجات المعينة" لأن البني مثلا قد يكون أقرب للأحمر و بالتالي يعامل معاملة الأحمر.

الألوان المحايدة تنتج عند مزج لونين متكاملين ، لهذا السبب ما بينت بدائرة الألوان اللي حطيتها فوق، كذلك يمكن "تحييد" أي لون تقريبا بإضافة اللون الرمادي له .. لكن بما إن احنا مصورين و مو رسامين راح نكتفي بالقول إن الألوان المحايده هي الألوان اللي ذكرتها فوق و هذي أمثله عليها:



أدري الصوره مو ذاك الزود لكن المهم إن تكون عندنا فكره عن "بعض" الألوان المحايده.


إنزين.. شنو فايدة هالألوان؟

فايدتها كبيره ، أولا، من إسمها.. هي ألوان محايده.. يعني تمشي مع كل شي ، لذلك فهي مناسبة جدا للخلفيات لأنك تقدر تحط أي لون جدامها و إنت متطمن إنها ما راح تخرب الدنيا.. خاصة إذا ما كان عندك روح المغامرة ;) ، لذلك -باستثناء مصور الجمعية الهندي- تستخدمها أغلب أستوديوهات التصوير للبورتريهات.

ثانيا ، تكسر حدة الألوان بالصوره و تعطي العين إحساس بالراحه ، بالتالي استخدامها بنسب و تكوينات معينه ممكن إنه يخدم الصوره بشكل كبير و يهدي جنون الألوان اللي فيها.

ثالثا، وهذي مهمة و صعبه بنفس الوقت ، من الممكن إن اللون المحايد بالصوره ، اذا استخدم بشكل معين، يساعد على إبراز العلاقات اللونية بالصوره.. خصوصا التكامل اللوني ، فاللون المحايد بهالحالة يكون مثل اللوحة الفاضيه.. كل شي تحطه عليها يبين و يبرز لأن اللون المحايد بروحه يعتبر لون ميت.


ملاحظة أخيره بخصوص الألوان المحايده.. و هي إن البعض يسميها الألوان الترابية أو الألوان الأرضية
(Earth Tones)
أنا شخصيا أسميها "الألوان الأثاثية".. مو لأن فيني لدغه و ما أعرف أقول السين.. لكن لأن الألوان المحايده هي الألوان المفضلة لدى مصممي الأثاث و الديكور و السبب يرجع لجميع ما ذكرناه أعلاه


أدري.. البحر بدى يغزر شوي شوي :p

و صج ان هالبحر كبير.. لكن مايته حلوه و ما ينشبع منها

أخوكم
مؤيد حسن
www.MScamera.info

جميع الحقوق محفوظة فيرجى ذكر المصدر عند النقل

[ali alnaimi]

يعطيج العافية اختي فاطمة على النقل المميز

[خالد بن سيف]

يعطيكي الصحة و العافية أختي فاطمة على الدرس القيم...

[الأمل]

fatma
درس قيم عن التكامل اللوني
يعطيك الف عافية
تحياتي لك

[fatma]

ali alnaimi الله يعافيك

خالد بن سيف يعافيك

الأمل يعافيج

على اني ما احب النقل لكن اكتشفت ان هنالك ما يستحق نقله من أناس مبدعين ^_^

[alrawhi]

درس رهيب وما فيه غنى عنه .. وما قصرت فاطمه وما عليك زود .. الله يعطيك العافيه

[عبدالعزيز الكبيسي]

والله درس قيم ومفيد

ماقصرتي اختي فاطمه

والله يعطيج الصحه والعافيه

[Ali Al-Mohannadi]

شفت الدرس المغرب ... لكن ما كان عندي وقت ارد على الموضوع

وبصراحة ... مشكورة على هذا النقل اللي فادني ... وفعلا موضوع يستحق كل مصور ان يقراه ويستفيد منه

جزاك الله الف خير

الله يعطيك الصحة والعافية ان شاء الله

تقبلي احترامي وتقديري

[المناعي]

موضوع جميل ومفيد جداً

يعطيج العافيه

[هاجر]

الله يعطيك العافيه عزيزتي على الدرس القيم جدا جدا جدا
تحياتي لك